Fyrri heimsstyrjöld: Sögutúlkanir og samtímaáhrif 1914-2014

Í tilefni þess að hundrað ár voru liðin frá upphafi fyrri heimsstyrjaldar var haldið alþjóðlegt málþing föstudaginn 24. október 2014 um sögutúlkanir og samtímaáhrif ófriðarins. Að málþinginu stóð Sagnfræðistofnun Háskóla Íslands í samvinnu við breska sendiráðið og þýska sendiráðið í Reykjavík (sjá dagskrá í viðhengi og upplýsingar um fyrirlesara hér að neðan).

Þar fluttu tveir erlendir fyrirlesar erindi: Christopher Cornelißen, prófessor í samtímasögu við Goethe-háskóla í Frankfurt, beindi sjónum að deilum sagnfræðinga um ábyrgð Þjóðverja á stríðsrekstrinum og Christopher Coker, prófessor í alþjóðasamskiptum við London School of Economics, fjallaði um áhrif ófriðarins og möguleikum á stórveldastríði á okkar tímum. Auk þess fluttu fjórir íslenskir sagnfræðingar erindi á málþinginu. Valur Ingimundarson, prófessor í samtímasögu við HÍ, greindi umfjöllun um stríðið út frá evrópskri sagnaritun og minni. Guðmundur Jónsson, prófessor í sagnfræði við HÍ, gerði að umtalsefni þær breytingar sem urðu á íslensku samfélagi í ófriðnum. Anna Agnarsdóttir, prófessor í sagnfræði við HÍ, fjallaði um sögulega hagsmuni breskra stjórnvalda á Íslandi á stríðstímum. Loks skoðaði Ólafur Arnar Sveinsson, doktorsnemi í sagnfræði við HÍ, þá orðræðu sem spannst í Norður-Ameríku um stríðsþátttöku hermanna af íslenskum ættum sem gengið höfðu í kanadíska herinn.

Ragnheiður Kristjánsdóttir, lektor í sagnfræði við HÍ, stjórnaði málþinginu.  Það fór fram á ensku og var haldið í fyrirlestrarsal Þjóðminjasafnsins kl. 13.00–17.00. Sjá nánar hér.

Þú ert að nota: brimir.rhi.hi.is