Sagnfræðistofnun er rannsóknastofnun innan Hugvísindastofnunar með aðsetur í Árnagarði. Meginviðfangsefni hennar allt frá stofnun 1971 hefur verið að efla rannsóknir í sagnfræði og síðar einnig í hagnýtri menningarmiðlun.

Stofnunin gengst fyrir útgáfu, ráðstefnum, fyrirlestrum og hvers kyns annarri starfsemi sem stutt getur rannsóknir og kennslu á starfssviði hennar. Einnig annast stofnunin þjónusturannsóknir fyrir opinbera aðila eða einkaaðila. Stofnunin leggur áherslu á tengsl rannsókna og kennslu, samskipti við alþjóðlegt háskólasamfélag og virka þátttöku í íslensku þjóðlífi.

Innan Sagnfræðistofnunar er öflugt fræðasamfélag kennara og framhaldsnema. Doktorsnemar eru á þriðja tug og fá þeir þjálfun og reynslu í vísindalegum vinnubrögðum.

Dagskrá Málstofu í félags- og hagsögu á haustmisseri 2022

Dagskrá Málstofu í félags- og hagsögu við Háskóla Íslands hefur verið kynnt fyrir haustmisseri 2022. Málstofan er umræðuvettvangur fyrir hvers konar efni í félags- og hagsögu á hvaða tímabili sem er. Hún er með óformlegu sniði þar sem fólki gefst tækifæri til að kynna rannsóknir sínar, verk í vinnslu jafnt sem útgefin verk, prófa nýjar hugmyndir og kenningar eða taka fyrri rannsóknir til gagnrýnnar skoðunar. Á eftir framsögum er gefinn góður tími til fyrirspurna og almennra umræðna. Málstofan er á vegum kennara í sagnfræði og viðskiptafræði í Háskóla Íslands. Málstofan verður haldin annan hvern þriðjudag í stofu 311 í Árnagarði kl. 16:00–17:00. Verið öll velkomin.

Sjá dagskrá Málstofu í félags- og hagsögu.

Image

Sagnfræðistofnun 50 ára

Sagnfræðistofnun Háskóla Íslands fagnar 50 ára starfsafmæli á þessu ári og af því tilefni hefur verið opnuð sýning í Þjóðarbókhlöðu um sögu stofnunarinnar. Sýningin var opnuð að viðstöddum forseta Íslands, menntamálaráðherra og rekstors Háskóla Íslands. Hún verður opin til loka nóvember. Sýningin er samstarfsverkefni Sagnfræðistofnunar Háskóla Íslands og Landsbókasafns Íslands – Háskólabókasafns